ಬೆಂಗಳೂರಿನ ಪದ್ಯಗಳು

ಟ್ರಾಫಿಕ್ಕು

ಸಿಗ್ನಲ್ಲಿಗೆ ಸಿಲುಕುವುದಿಲ್ಲ
ಹಸಿರಿಗೆ ಕಾಯುವುದಿಲ್ಲ
ಕೊಚ್ಚಿ ಹರಿಯುವುದೇ ನಿಜದ ರೀತಿ
ಹೆದ್ದಾರಿಗಳಲ್ಲಿ ಪ್ರಚಂಡ ಪ್ರವಾಹ 
ಸಂದಿಗೊಂದಿಗಳಲ್ಲಿ ನುಗ್ಗಿ ತುಳುಕಿ
ನಿಂತರೂ ಹರಿಯುತ್ತಿರುವ ಭಾಸ
ಮನೆಯಲ್ಲಿದ್ದರೂ ಮನಹೊಕ್ಕು
ವಿಶ್ರಾಂತರನ್ನು ವಿಚಲಿಸಿ ಚಲಿಸಿ
ಬೆದಬೆದರಿ ಹರಿದು ಭಯ ಮೂಡಿಸುತ್ತಾ
ನಿಲ್ಲಬಾರದೆಂಬ ಕಪ್ಪು ಪ್ರವಾಹವಿದು
ಈ ಭಯದ ಕಾಲುವೆಗಳಲ್ಲಿ 
ಮುಳುಗೇಳುತ್ತಲಿದೆ
ಬೆಂಗಳೂರು